மன நோய் நமக்கு நாமே உருவாக்கிக் கொள்வது.!

நெல்லையில் இருட்டுக் கடை அல்வா என்றால் தெரியாதவர்கள் இல்லை, என்ற அளவு மிகவும் பிரபலமான அந்த கடையில் தயாரிக்கப் படும் அல்வாவில் உள்ள ருசிக்கு கொஞ்சமும் மாறாத அளவு சாந்தி ஸ்வீட்ஸ் அல்வாவும் இருக்கிறது. ஆனால் மக்கள் அதிகம் விரும்புவது இருட்டுக் கடை அல்வா என்ற ஒரு பெயரை தான். 

சாந்தி ஸ்வீட்ஸ் கூட முறையாக தன்னுடைய கடையின் பெயரை பதிவு செய்யாத காரணத்தால் இன்று நெல்லை புதிய பழைய பேருந்து நிலையங்களில் அனைத்து கடைகளின் முன்பும் சாந்தி ஸ்வீட்ஸ் என்ற பெயர் பலகையும் அதனுடன் அவர்கள் விற்கும் அல்வாவில் கொடுக்கப் படும் பாலித்தீன் பையிலும் சாந்தி ஸ்வீட்ஸ் என்று தான் குறிப்பிடப் பட்டிருக்கும். அனைத்து கடைகளிலும் இதுவே 

சில கடைகளில் அவர்களே தயாரிப்பது உண்டு சுட சுட அல்வா என்ற வியாபாரம் தான் சூடு பிடிக்கவும் செய்கிறது. இப்போது என்ன அல்வாவை உண்டால் என்ன கிட்ட தட்ட அனைத்தும் ஒரே மாதியான சுவைதான். விலையும் ஒன்று தான் ஆனால் மக்கள் வேண்டும் என்று நினைப்பதும், கொண்டாடுவதும் இருட்டுக் கடை அல்வாவை தான்.

ஏனென்றால் அவ்வளவு பிரபலம் மக்கள் மத்தியில் இதில் கொஞ்சம் விவரமானவர்கள் ஒரிஜினல் சாந்தி ஸ்வீட்ஸ் கடை நெல்லை பழைய பேருந்து நிலையத்தருகில் உள்ளது அங்கு சென்று வாங்கிக் கொள்வார்கள். புதிய பேருந்து நிலையம் செல்பவர்கள் அங்கு ஏதோ ஒரு கடையில் வாங்கிக் கொண்டு எல்லாம் ஒரே அல்வா தான் என்று தங்களை தாமே தேற்றிக் கொள்வது தான் வளக்கம்.

வேறு என்ன செய்ய அவசர பயணங்களில் வீட்டிற்கு அல்லது விருந்தினருக்கு ஏதாவது வாங்கி கொண்டு செல்ல வேண்டும். தேடி அலைந்து இருட்டுக் கடை அல்வாவிர்க்கோ அல்லது ஒரிஜினல் சாந்தி ஸ்வீட்டுக்கோ முக்கியத்துவம் இல்லை அங்கு  அவ்வளவு தான் அந்த நேரங்களில் நம் மனதை நாமே கட்டுபாடு செய்து கொள்வதில்லையா!

நீங்கள் புதிய பேருந்து நிலையத்தில் அல்வா வாங்க உங்கள் நண்பர் அல்லது மனைவி யாரோ உங்களிடம் இது ஒரிஜினல் கிடையாதே என்று கூறினால் உங்களுடைய எண்ணம் எப்படி இருக்கும் ஒவ்வொருவரும் ஓர் விதம் என்பது போல சிலர் "அது எல்லாம் ஒன்னுமில்லடே, எல்லாம் ஒரே டேஸ்ட்டு தான்" என்பார்கள். இன்னும் சிலர் "அது என்னவோ உள்ளது தான் ஆனால் இப்போ நேரம் போதாது டேய் அங்க வர போய் வாங்க கடக்கத வாங்கிட்டு போவோம்" கடிகாரர் டேஸ்ட்டு பாக்க கொஞ்சம் கொடுக்க "நல்லா தாண்டே இருக்கு" என்று வாங்கி செல்கிறார்கள்.

மற்றையோர் சிலர் சரி அங்க போய் வாங்குவோம் என்று பழைய பேருந்து நிலையம் செல்வதுண்டு. காரில் செல்பவர்கள் நிச்சயமாக இருட்டுக் கடை அல்வா நோக்கி செல்வார்கள் மாலை பொழுது மட்டுமே கடை இருக்கும் என்பதால் சாந்தி ஸ்வீட் அவர்களுக்கு விருந்து கொடுக்கிறது அன்று அவர்களுக்கு அது தான் ஸ்பெசல் ஆகிறது இப்படி மனித மனம் அனைத்தையும் ஏற்றுக் கொள்ளவும் முடிகிறது. இதனை புரிந்துக் கொண்டால் உங்களை நீங்களே மாற்றிக் கொள்ளும் வல்லமை கிடைக்கும்.

ஆம் அனைவரும் சூழ்நிலைகளைப் பொறுத்து தான் முடிவுகளை எடுக்கிறார்கள் இதில் பிடிவாதம் என்பது மன நோய், கோபம் என்பது மன நோய் ஒரு உதாரணத்திற்காக கூறப்பட்டது தான் அல்வா கதை ஆனால் இது போல பல நிகழ்வுகள் வாழ்வில் நடக்கும். மனதில் ஓட்டத்தை கட்டுப் படுத்த முடியாது. அப்படி இப்படியென்று பல கதைகள் இருந்தாலும், நாம் அனைவரும் மனதை கட்டுப் படுத்திக் கொண்டு தான் வாழ்கிறோம் என்பதில் எந்த வித மாற்றுக் கருத்தும் யாருக்கும் இருந்து விட முடியாது.

ஒரு கார் அல்லது செருப்பு வாங்கும் இடத்தில் கூட மனம் விரும்பிய ஒன்றை வாங்க பணம் தடையாகும் போது மனதை மாற்றிக் கொண்டு, இருக்கும் பணத்திற்கு என்ன கிடைக்குமோ அதனையே வாங்கிக் கொண்டு வருகிறோம். 

மனம் கொள்ளும் பரவசத்திற்கு எல்லாம் ஆடிப் பாடிட முடியாது. இந்த கட்டுப் பாடுகளை நாம் அதீத உணர்ச்சிவப் படும் போது இழக்கிறோம். 

கொஞ்சம் பொறுமையாக சிந்தித்து பார்த்தாலே நம்முடைய முக்கால் வாசி குழப்பங்களும், பிரச்சனைகளும் தீர்ந்து விடும் நேரம் இல்லை, நேரம் இல்லையென்று முழு நேரங்களையும் நாம் வீணாக கழுத்துக் கொண்டிருக்கிறோம்.

நிதானமான சுவாசம் நிம்மதியை தரும் உங்கள் பதற்றங்களை குறைக்கும். உங்கள் உள் அன்பு அதிகமாகும் போது ஆசைகள் பெருமளவில் குறைந்து விடும். 

சுவாசம் உள்ளவரை நேசிப்போம்...😊